გარემოსდაცვით ინფორმაციაზე დროული ხელმისაწვდომობა და გადაწყვეტილებების მიღების ყველა ეტაპზე საზოგადოების ეფექტური მონაწილეობა ქვეყნისთვის მნიშვნელოვანი  გამოწვევაა.

აღნიშნული ვალდებულება ღია მმართველობა საქართველოს 2016-2017 წლების სამოქმედო გეგმის მე-16 ვალდებულების (გარემოსდაცვითი შეფასების კოდექსის მიღება) გაგრძელებაა, რომლის ფარგლებშიც საქართველოს გარემოს დაცვისა და სოფლის მეურნეობის სამინისტრომ „გარემოსდაცითი შეფასების კოდექსი“ შეიმუშავა და ვალდებულება სრულად შეასრულა.

საქართველოს პარლამენტმა 2017 წლის 1 ივნისს მიიღო კოდექსი, რომელიც  სრულად შეესაბამება როგორც ევროკავშირის გარემოზე ზემოქმედების შეფასებისა და სტრატეგიული გარემოსდაცვითი შეფასების დირექტივებს, ასევე გარემოსდაცვით საკითხებთან დაკავშირებული ინფორმაციის ხელმისაწვდომობის, გადაწყვეტილებების მიღების პროცესში საზოგადოების მონაწილეობისა და ამ სფეროში მართლმსაჯულების საკითხებზე ხელმისაწვდომობის შესახებ კონვენციას (ორჰუსის კონვენცია).

გარემოსდაცვითი გადაწყვეტილებების მიღების პროცესში საზოგადოების მონაწილეობის მიზნით, სამინისტრო უზრუნველყოფს კანონმდებლობით დადგენილი დოკუმენტაციის სრულად განთავსებას სამინისტრო სოფიციალურ ვებგვერდზე, თუმცა აღნიშნული ინფორმაცია არ არის განთავსებული სისტემატიზებული სახით და მარტივად ხელმისაწვდომი.

სწორედ აღნიშნული პრობლემის აღმოფხვრას ისახავს მიზნად 2018-2019 წლების სამოქმედო გეგმის ფარგლებში, სსიპ - გარემოსდაცვითი ინფორმაციისა და განათლების ცენტრის ვალდებულება, რომელიც გულისხმობს გარემოსდაცვითი შეფასების კოდექსით გათვალისწინებული მოთხოვნების შესასრულებლად ელექტრონული პორტალის ამოქმედებას.

ვალდებულების ფარგლებში, მიმდინარეობს მუშაობა ელექტრონული სისტემის შექმნაზე, რომელმაც ეფექტურად უნდა უზრუნველყოს ინფორმაციაზე დროული და დაუბრკოლებელი ხელმისაწვდომობა და გადაწყვეტილებების მიღების ყველა ეტაპზე საზოგადოების ჩართულობა. ელექტრონული სისტემის საშუალებით დაინტერესებულ საზოგადოებას მიეცემა შესაძლებლობა, გარემოსდაცვითი შეფასების კოდექსით გათვალისწინებულ პროცედურებთან დაკავშირებით ადმინისტრაციული წარმოებების შესახებ მიიღოს სრულყოფილი ინფორმაცია სისტემატიზებული სახით და მარტივი ინტერფეისით. გარდა ამისა, აღნიშნული პლატფორმა ხელს შეუწყობს ინფრასტრუქტურული პროექტებისა და მათი გარემოზე ზემოქმედების შესახებ ინფორმაციის საჯარო ხელმისაწვდომობას და წაახალისებს მსგავსი პროექტების განხორციელებისათვის საჭირო გადაწყვეტილებების მიღების პროცესში მოქალაქეთა და სხვა დაინტერესებულ პირთა ჩართულობას.